丹麥周一(8日)凌晨熱身賽對烏克蘭，下半場出現驚心動魄場面，老將基斯甸艾歷臣突然掩住胸口痛苦倒地，同佢5年前歐國盃比賽中突發心臟病暈倒一模一樣。艾歷臣喺場上經過5分鐘搶救後，順利恢復意識，可自行上救護車去醫院。軍醫指艾歷臣當年植入嘅心臟除顫器發揮作用，救佢一命。
丹麥同烏克蘭都冇份踢世盃，今仗丹麥由柏德列多古同米希利入波，半場領先2比1。踢到65分鐘，正選上陣嘅艾歷臣前場嘗試逼搶，轉身後突然表現痛苦、雙手按胸，直播鏡頭亦即刻轉走，只見其他球員緊張揚手示意軍醫入場，有球員表現擔心同哀傷，雙方球員亦圍圈築人牆，畀軍醫專心搶救。
艾歷臣再次暈倒球場：https://x.com/adarauva/status/2063684697117380770/video/1
經過大約5分鐘急救後，艾歷臣亦恢復意識，可以企番起身，喺老婆陪同下上救護車去醫院做進一步檢查，球證亦示意比賽腰斬。艾歷臣喺2021年嘅歐國盃，分組賽對芬蘭曾經突發心臟病暈倒，據報當時曾停止心跳5分鐘，「死過翻生」後植入心臟除顫器繼續踢波，34歲嘅佢目前效力德甲禾夫斯堡。
兩隊球員齊心保護艾歷臣：
https://x.com/kristtianc/status/2063772454913224816/video/1
5年前救番艾歷臣嘅丹麥軍醫保爾臣表示：「艾歷臣情況好好，可以自己步離球場，個心臟除顫器發揮出作用，佢仲要做檢查去斷定點解發生呢件事，艾歷臣叫我代佢答謝所有球員，同大家講佢一切安好。」丹麥隊長賀積查治就話：「最重要係艾歷臣同佢屋企人冇事，大家反應都好迅速，而且互相尊重，感恩。我想盡快返屋企見我嘅家人。」
閃擊世盃2026，有齊球星資料，砌出你心目中最佳11人：